15 ақпан данықты жерлесіміз, қазақ киносының атасы Ш.Аймановтың туған күні. Шәкен (Шаһкерім) Айманов — актер, режиссер
15 ақпан данықты жерлесіміз, қазақ киносының атасы Ш.Аймановтың туған күні. Шәкен (Шаһкерім) Айманов — актер, режиссер. Болашақ актер 1914 ж. 15 ақпанда қазіргі Павлодар облысының Баянауыл ауданында, Торайғыр ауылына қарасты Айманбұлақ қыстауында туған. Арғын тайпасның Сүйіндік руының Айдабол бөлімінен шыққан. Ол кішкентай кезінен жездесі Қали Байжановтың әндерін тыңдап өскен. Ауыл мектебін бітіріп, (1928), Семейдегі педагогикалық техникумға оқуға түскен. Семей мұғалімдер техникумында оқып жүргенде 1932 ж. Алматыдағы Қазақ драма театрына шақырылады.
Айманов 1932 – 33 жылғы маусымнан театрға жұмысқа қабылданды. Ол алғашында бірқатар рөлдерді ойнады. Көп ұзамай классикалық пьесалар бойынша қойылған спектакльдерде басты рөлдерді шебер орындауымен көпшілік көзіне түседі. Әсіресе оның орындауындағы Ақан сері, Қобыланды, Сатин, Петруччо, Отелло рөлдері ұлттық театр тарихында өшпес із қалдырды. Айманов актерлік өнерімен қатар режиссерлік шығармашылықпен де айналысып, спектакльдер қояды.1947 – 51 ж. қазіргі Қазақтың академиялық драма театрының бас режиссері болды. «Абай әндері» (1945), «Жамбыл» (1947) көркем фильмдерінде күрделі экрандық бейнелерді сомдады. 1953 – 70 ж. «Қазақфильм» студиясының көркемдік жағын басқарып, қазақ кино өнерінің өркендеуіне үлкен үлес қосты. Оның қойған көркем фильмдері: «Махаббат туралы аңыз» (1953), «Алдар көсе» (1965), «Атамекен» (1966), «Найзатас баурайында» (1968). Көрермен қауымның ой-талғамынан шыққан «Біздің сүйікті дәрігер» (1958) мен «Тақиялы періште» (1969) фильмдері ұлттық кино өнерінде комедиялық жанрды дамытудағы соны ізденістерімен ерекшеленді. Оның соңғы қойған «Атаманның ақыры» (1970) фильмі режиссер Айманов шығармашылығының биік шыңына айналды.Айманов Қазақстан Кинематографистер одағын ұйымдастыруға қатысып, одақ басқармасының 1-хатшысы (1958 – 70) қызметін атқарды. КСРО Мемлекеттік сыйлығының (1952) және Қазақ КСР-і Мемлекеттік сыйлығының (1968) лауреаты. 1970 ж. 24 желтоқсанда Мәскеу қаласында жол апатынан қайғылы қазаға ұшырады; Алматы қаласында жерленді.Ш.Айманов есімі мектебімізге 1971 жылы берілген болатын.Содан бері мектебіміздің шәкірттері мен ұстаздары Ш.Аймановтың есімін дәріптеп келеді.Атап айтсақ мектеп қабырғасында Ш.Айманов мектеп мұражай жұмыс істеп тұр, соныман қатар мектеп ұжымы 2016 жылы Ш.Аймановтың туған жеріне Айманбұлақ қыстауына белгі тас қойған болатын.Жыл сайын Ш.Аймановтың туған күніне орай мектебімізде тәрбие сағаттары, мұражайға саяхат және дәстіүрге айналған Ш.Айманов оқулары мектебімізде жалғасын табуда. Ш.Аймановтың өнерге салған сара жолын жас ұрпақ, мектеп ұжымы қашанда дәріптей бермек.
